Mga Balas o Tarawih (Ramadhan 2017)

1. Phakalowas so tao ko dosa niyan sii ko paganay a kagagawii ko Ramadan sa lagid o kinimbawataanon o ina iyan. 2. Sii ko ikadowa a kagagawii na kharilaan ska niyan ago so mbala a loks iyan, opama mambo ka mga mu’min so mbala a loks iyan. 3. Sii ko ikatlo a kagagawii na adn a phananawag a malaikat sii ko kababa-an o Arsh a aya katharo iyan na (hay oripn na) tatarosn ka so dingadi kapagamal ka iprila rka o Allah so miyangaiipos a dosangka. 4. Sii ko ikapat a kagagawii na aya khakowa niyan a balas na timbang a lagid oba niyan miyabatiya so kitab a Taurat ago Injeel ago Qur-an. 5. Sii ko ikalima a kagagawii na mbalasan ska niyan o Allah sa lagid o imbalas iyan ko tao a miyakasambayang sa Masjidil Haram, go Masjidin Nabawi, go Masjidil Aqsa. 6. Sii ko ikanm a kagagawii na mbgan ska niyan o allah sa lagid o Balas o tao a miyakathawaf sa “Al-Baitul Ma’moor” a raks a ip’phamangni ska niyan o langowan a ator sa karila iron o Allah. 7. Sii ko ikapito a kagagawii na timbang a lagid oba niyan minipraota so nabiyullah Moosa (Alaihis salam) a raks a timbang a lagid oba niyan miyasalapidao so Moosa san ko kiniphantagn iyan ko Fir’aun ago so Haman. 8. Sii ko ikawalo a kagagawii na imbgay ron o Allah so nganin a lagid o inibgay niyan ko Nabiyullah Ibraheem. 9. Sii ko ikasiyaw a kagagawii na timbang a Lagid oba niyan miyasimba so Allah sa lagid o kiyasimba-aon o Nabi. 10. Sii ko ikasapolo a kagagawii na iprizki ron o Allah so mapiya ko doniya ago so Akhirat. 11. Sii ko ikasapolo ago isa a kagagawii na aya mapmbtad a kakhaganati niyan ko doniya na lagid o masa a kinimbawata anon o ina iyan. 12. Sii ko ikasapolo ago dowa a kagagawii na phakatalingoma ska niyan ko alongan a maori a tomitihaya so bontal iyan sa lagid o Olan sii ko ikapat a taling ko ayag. 13. Sii ko ikasapolo ago tlo a kagagawii na phakatalingoma ska niyan ko Alongan a Qiyamah a makalilidas ska niyan ko langowan a marata (margn). 14. Sii ko ikasapolo ago pat a kagagawii na pzaksian ska niyan o mga malaikat sa kiyasambayang iyan sa tarawi, na diska niyan dn somariyaan o Allah sa Alongan a Qiyamah. 15. Sii ko ikasapolo ago lima a kagagawii na zalawatan ska niyan o mga malaikat ago so mga malaikat a maaawid ko Arsh ago so Korsi. 16. Sii ko ikasapolo ago nm a kagagawii na phakisorat o Allah a bagi-an iyan so kapakalidas ko naraka, na aya mapmbagi-an iyan na so Sorga. 17. Sii ko ikasapolo ago pito a kagagawii na imbgay ron o Allah so Balas a lagid o inibgay niyan ko mga Nabi. 18. Sii ko ikasapolo ago walo a kagagawii na adn a malaikat a aya iphananawag iyan na Hay oripn o Allah (a mitharawi sa giyai a kagagawii) na mataana so Allah na miyasowat rka ago miyasowat ko mbala a loks ka. 19. Sii ko ikasapolo ago siyaw a kagagawii na iphoro o Allah so daradat iyan sii ko Firdaos. 20. Sii ko ikadowa polo a kagagawii na imbgay ron so balas a lagid o inibalas ko mga tao a mga Shaheed ago so mga tao a mga bara amal. 21. Sii ko ikadowa polo ago isa a kagagawii na ipmbalay ska niyan o Allah sa walay ko sorga a poon sa tihaya. 22. Sii ko ikadowa polo ago dowa a kagagawii na phakatalingoma ska niyan sii ko alongan a qiyamah a makalilidas ska niyan ko mga awida akal ago so mga kamargnan. 23. Sii ko ikadowa polo ago tlo a kagagawii na mbgan ska niyan o Allah sa satiman a ingd ko Sorga. 24. Sii ko ikadowa polo ago pat a kagagawii na mapmbagiyan iyan so dowa polo ago pat a pangni a tatarimaan. 25. Sii ko ikadowa polo ago lima a kagagawii na phakalidasn ska niyan o Allah ko siksa ko Kobor. 26. Sii ko ikadowa polo ago nm a kagagawii na imbgay ron o Allah so balas o patplo ragon a simba. 27. Sii ko ikadowa polo ago pito a kagagawii na phakatitay ska niyan ko Sirat sa lagid o kagaan o kilat. 28. Sii ko ikadowa polo ago walo a kagagawii na iphoro o allah so pangkatan iyan ko sorga sa sanggibo ka pangkatan. 29. Sii ko ikadowa polo ago siyaw a kagagawii na imbagy ron o Allah so Balas o sanggibo a Nayhaji a tiyarima. 30. Sii ko ikatlo polo a kagagawii na aya ptharoon o Allah na Hay oripn akn na kangka dn ko mga sapadan ko Sorga ago phaigo kadn ko ig a salsabeel, go inom ka ko ig a kauthar ka sakn so kadnan ka na ska so oripn akn.